Таханарча денна, из я-коартол, гидуаргаш.

Коартол шин сортах я — «Удача», «Крон», уж хьалкхеяьй 52 гектара тIа. Цул совгIа, «Удача» сорта лаьрхIа, 32 гектар лаьтта хьакъоастадаьд.

Боахама кулгалхочо Исмейланаькъан Тамерлана яхачох, коартол дика хиннай, цудухьа из бахархошка а дIакхоачаргья, 25 сома маьхах кийла йолаш.

«Еррига а дIалаьрхIача, таханарча денна, ворхI гектара тIара коартол чуийца яьнний, юкъера хьаийцача из хул 250 ц/гектар, эца лаьрхIа хиннача 175 тоннага диллача из дика хьувкъам ба. ХIанз укх сахьте из хоржаш, дIаювргйола фуна юташ йола коартол, 2023 шера лаьрхIа юстара а йоаккхаш, цунах дисса дакъа баьцадаараш лорадеча базе дIайохьийт.

Коартол йоацаш 50 гектара тIара гидуаргаш чуийцай, 12 ц/гектара тIара, из чуэца лаьрхIад 84 тонн.

Цул тIехьагIа, хьажкIаш чуэца долалургда тхо. Ара этта хаоттам дика ба. Деррига балхаш лаьрхIа хиннача боарамах дIахьош да. Хьувкъамо гIадвуг», — аьлар Исмейланаькъан Тамерлана.