ИнгГУ «ГӀалгӀайче - кагирхой бӀаргашца» яха суртий яхь дӀакхайкаяьй
«ХӀама хьехар – гӀулакх дарца» яхача программанна чуйоагӀаш, ГӀалгӀай паччахьалкхен университете дӀайолаелар «ГӀалгӀайче кагирхой БӀаргашца» яха суртий яхь, из вӀашагӀъеллараша республикера сурташ доахаш бола кагирхой тӀахьех вай мехка массайолча оагӀорахьара хозаленаш гойтача дакъа лаца.
«Цу яхье хила йиш йолаш ва ГӀалгӀайчен моллагӀа вола 14 шергара 35 шерга кхаччалца ха яьнна вахархо. ДикагӀа долча балхаша шоай моттиг хьалоацаргья гойтаме, уж го йиш хургья оагӀой бетта университете хьалтеха доахкаш.
Яхьах лаьца беррига хоам телеграм-каналага гӀолла ха йиш я», - аьлар «Сердало» газетага паччахьалкхен университете.
Яхь дӀаяхьара маӀан да, кагирхой сурташ дахарцара безам совбаккхарал совгӀа, хьамсарча мехка Ӏалама хозаленаш йовзийтар а. Цига дакъа лоацаш, къонача сурташ доахараша шоай хьамсарча мехкацара безам а бовзийтаргба, ГӀалгӀай мехка куц лорадара беш болча балха дакъа юкъе а хьоргда.
