ГӀалгӀай метта хетаяь Ӏилман семинар дӀайихьар Ӏилма-тохкама институте
Наьна метта хетадаьча дерригача къамашта юкъерча денна хетаяь Ӏилман семинар дӀайихьар, вай Ӏилма-тохкама институте. ГӀалгӀай меттаца дувзаденна долча керттерчарех дийцар гулбеннараша. Института кулгал деча Харсенаькъан Бориса, семинар хьаеллаш, белгалдир; наьна мотт кхувш латтача тӀехьенна мерзбар, дикагӀа бовзийтар, лархӀийтар мел лоархӀаме гӀулакх да тахан.
Меттацара кӀоаргаленаш тохкаш, шоаш даьча балхех дийцар гулбеннараша. Эггара керте лаьцар, къаман мотт бовргбоацаш, дӀабахьа беза болх, юкъедоаладе дезараш.
ГӀалгӀай метта дешай кхоачамах, царца дувзаденнача хаттарех, этимологех, керда дешаш хьакхолларах дийцар семинаре. Тахан вай къаман юкъе мотт бувцара гӀулакх малагӀча хьал тӀа да хьоахадир цига.
Белгалдир, кагирхошта юкъе меттаца лакха лерхӀам хургбола, из боаггӀача боараме Ӏомабе чам хургбола болх дӀабахьа безаш хиларах. Меттацара хӀама тахан, вай массане цхьа барт болаш, дӀадахьа, лораде дезаш да; хӀана аьлча метта гӀулакх телхача, къаман деррига хӀама кӀалдус.
