Мехкара 13 лаьттан дакъа муниципальни доалахьа дерзадир
Наьсарен кхален прокуратуро чубеннача лоткъамах болх дӏабихьа, Эккажкъонгий-Юртара бокъо йоацаш дӏалаьца 13 лаьттан доазув мукъадаьккхар. Из хоам «Сердалога» бир ӏаьдала болхлоша.
«Дӏабихьача тохкамо гучадаьккхачох, Эккажкъонгий-Юртарча администраце 2014-ча шергара 2018-ча шерга кхаччалца йолча хана, цхьаккха бокъо йоацаш, харцахьа каьхаташ увттадеш, бахархошта лаьтташ дӏатийнад. Хьатийнача каьхаташка гӏолла лаьттан доазош шоай доалахьа дерзадаьд бахархоша», - дийцар мехкарча Прокуратуре.
Иштта белгалду, лаьтташ дӏа-хьа къоастадаь цахиларах, уж наха дӏадекъа йиш йолаш Наьсарен кхален администраци мара ца хиннилга.
Наьсарен кхален прокурора искага гӏолла болх дӏабихьа, 6 миллион мах бола 13 лаьттан доазув, бокъо йоацаш дӏа-хьа дийкъачара, юха ӏаьдала доалахьа дерзадир.
