«Паччахьалкхен кулгалхо харжар, мехка политически лоархӀаме гӀулакх да, цудухьа хьалххе а цунга кийчо яра бола болх ба дӀахьош. Республикан хьалхашка латтар бехктокхаме декхар да, къаьстта хоржамашка кийчо яра болх вӀашагӀболлаш хиларах. Хоржамхошта юкъе хоамий - тохкама болх дӀабахьара керттера терко лоаттаю. Тхо хьож тхоашта могар де, хоржамех лаьца наха дукхагӀа довзаргдолаш, юкъедахьа кердадараш цар кхетадеш хургдолаш, нахага уж дӀакхоачаргдолаш», - аьлар республикан кулгалхочо Келаматанаькъан Махьмуд-Ӏаьлас, ше лоархӀамеча паччахьалкхен хоржамех дувцаш.

Цо теркам тӀабахийтар таханарча дийнахьа СВО латтача хьала, кхыча паччахьалкхений оагӀорахьара вайна санкцешца духьалйоахача халонашта, вай мехкаца моастагӀал леладеш йола паччахьалкхенаш, Россе вахар кегаде гӀерташ, къахьегаш хилара.

Цу хьакъехьа Махьмуд-Ӏаьлас яхачох, РФ моттигий хургдола вахар тийша да хоржамех. Махьмуд-Ӏаьлас иштта белгалдир, кхадж тосса ди – российски паччахьалкхен кулгалхо харжар - Рамадана бутт дӀаболабаларца нийслулга. Цудухьа наьха марха даста таро хургйола хьалаш вӀашагӀдохка деза хоржамаш долча моттигашка, иштта цига хургба полице болхлой, тӀахьожараш, кхыбола нах - хоржамашка хьа мел боагӀараш.

«ХӀанз укх сахьате, вай паччахьалкхен Кулгалхо харжара долча хоржамашта еш йола кийчо дика я. Деррига балхаш лерттӀа, ший ханнахьа дӀахьош да, кхетаченаш а хан-ханнахьа дӀахьу Россе ЦИКа чӀоагӀдаьча ханоргага хьежжа а иштта хоржамий бокъонаша дӀадеххача беса а», - аьлар ГӀалгӀайчен Кулгалхочо.