33 эзар совгӀа боккхий дезалаш ба вай мехка, уж ди тӀехьа дукхагӀа хулаш латт
Таханарча дийнахьа, 33 эзар совгӀа дукха бераш дола боккхий дезалаш ба вай мехка. ХӀара дийнахьа айлуш латт из таьрахь вай республике. Из белгалдир вай мехкадас Келаматанаькъан Махьмуд-Ӏаьлас, «Кхоачарбараш - дега безараш» яха Еррига Росси чулоацаш йолча дезала кхетаче вай республика гойтаргйолча ЦӀечой дезалах дувцаш.
Из хоам «Сердало» газетага бир мехка кулгалхочун зарбан болх лелабераша.
«Цу наха вайна хьагойт, Даьхе яха дош шоай дегашта мел деза, боча да, Даьхен бокъонаш лораеш латта шоаш кийча болга. Шолжа-Шахьаре бахача ЦӀечой 17 дезалхо ва, царех хьадаьнна 35 бер а кхедаьд, эздий хьехам луш. Дезала да вола ЦӀечой Ӏаддал-Керам ше ва боккхача дезале кхийна. 30 шу совгӀа ха, наьха бокъонаш лораеча балха къахьегаш, дӀаеннай цо.
Полковник чин долаш, Илдарха-ГӀалий тӀарча ОВД кулгалхо волаш, къахьийгад цо. 2009-ча шера къаман моастагӀаша даьча хатарах, 52 шу даьнна мара воацаш, хаьдар цун вахара никъ. Ший да санна Ӏаьдала балха тӀа къахьегаш хиннача 11 воӀа юкъерча ЦӀечой Ӏаьлий вахара никъ а хаьдар, ший балха декхараш кхоачашдеш. Денала орденаш елар даьна, воӀа. Йоккха хало я из цу дезалерча наха», - дийцар вай Мехкадас, цу деналах бизза хиннача наьха вахара никъах.
Боккхий дезалаш хӀара шера дукхагӀа хулаш латт вай мехка. БоаггӀача боараме уж хьалкхебе мел эшачунга хьожаш хргда вай, низ дӀа ма кхоачча. ДоггӀаш дола гӀо ду къаман юкъе белггалара болх беш йолча проекташа, хьалъеча гӀишлоша, хьаеллаш латтача спорта моттигаша.
Мехкадас хьоахадир, дезала шу вай къаман наха юкъера бувзам, беркате оамалаш, къаман лоархӀамедараш чӀоагӀдеш, тоадеш дӀадахьа дезилгах.
