ГӀалгӀайчен Кулгалхочо Келаматанаькъан Махьмуд-Ӏаьлас, Кавказе лаьттача тӀем тӀа моастагӀа эшаваь 80 шу дузаш хиларца, кхайкарал дир. Эггара чӀоагӀагӀа Сийлахь-боккха Даьймехка тӀом Кавказе латтача хана, моастагӀчоа духьалъэтта, из каталонца чакхбаьккхар советски бӀево, юхебиса моастагӀий сийдолча Кавказа лаьттара байдар, цӀаккха а шоашта вай халкъагара котало йохьалургйоацилга кхетадеш. Атта дацар котало яккха. Цу юкъе шоашкара дакъа юкъедихьар вай къаман къонгаша, мехкараша. «Цу халача, шера совгӀа лаьттача тӀем тӀа байра 300 эзар совгӀа тайп-тайпарча къамех бола нах, хӀаьта МагӀалбике моастагӀа тӀа ца вайташ лаьттача тӀем тӀа - 120 эзар советски салте, эпсар.

МоастагӀчунна духьалъотта дезаш хилар ЦӀе эскар. Бакъда вай оагӀорахьа дар, шоай Даьхе езаш хилар, нийсхо. Царна деза дар шоай лаьтта, уж кийча бар из бахьан бала. Кавказе лаьттача тӀемо бохабир Сийлахь-боккхача Даьймехка тӀема низ, къаьстта малхбоален даькъ тӀа лаьттача тӀем тӀа. Кавказа мехкдаьттанна тӀагӀерташ хинна моастагӀа вохавир. Из ваьсса юхавийрзар. Кавказе бахача наха шоашкара дика дакъа лаьцар, моастагӀа эшавеш. Вайна цӀаккха а дицлургдац турпала наькъаш! Вайна дагадоагӀа, вай доаккхал ду!» - аьлар, ше кхайкарал деш, Махьмуд-Ӏаьлас. Кавказ лораеш моастагӀчоа духьалъэтта, мехкадаьттан шахьар МагӀалбик, моастагӀчунга дIа ца кхачийтача бӀухой сий лорадергда ГӀалгӀайчено, карарча хана, цар лораяьча шахьаро лелаю «ТӀема сийлен гIала» яха еза цIи.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде