Республикера моттигаш тоаю болх аханега кхаьчаб
Тоае еза аьнна соцам баьча моттигашкара, нийсса ах болх йистебаьккхаб республике. Дикка къахьийгад, из кхоачашдеш, Наьсарерча, МагӀалбикерча, Шолжерча, ЖӀайрахьарча хьакимаша, иштта Илдарха-ГӀалий тӀарча кулгалхоша.
«Шахьара куц тоадара тӀехьа кхеллача проектага гӀолла дӀахьош хинна 2023-ча шерара балхаш йистедаьлар цу моттигашка. 11 урам тӀа асфальт Ӏобуллаш, керда лампаш, гӀандаш догӀаш, нувхашта лаьрхӀа яьшкаш оттаеш, къахьийгар цига. Йистедоалаш латт Наьсарера, Шолжа-Шахьарера, Магасера диса балхаш.
Цхьацца кхоачамбоацараш меттадоаладаь, моттигаш нувхех цӀенъеш къахьийгача йистебоал болхлой», - йоах тха «Сердало» газетага цу гӀулакхах бехктокхаме болча наха.
Цу беркатеча проектага гӀолла дукха салоӀа моттигаш, урамаш, бургацах ловзаш дола доазош куц тоадаь Ӏооттадир вай мехка. Бахархой хьал дикка аттачахьа доаккх цу гӀулакхо.
