ГIалгIай мехка хьалхагIа йистедаьхар 12 никъ тоабеш долабалхаш
ГIалгIайче даь даьлар 42 километр бола никъ тоабу балхаш. Из болх дIабахьа таро хилар, «Вахара хьалаш» яха къаман программа кхоачашъеш хиларах. Цох дийцар ГIалгIай Республикан Кулгалхочун, Паччахаьклхен зарбан болх лелабераша.
ЛоархIамеча проектех яр – СурхотIе - Алхасте никъ цIенхаштта тоабар, из 8 километр совгIа бар, иштта Наьсаре-Шолже никъ а тоабаьб. Цул совгIа, лаьрхIа хинначул хьалхагIа тоабаь баьлар Шолжера Пхьилекъонгий урам. Иштта кердадаьхад Наьсарен Iарчакханаькъан, МагIалбика НурадиловгIар, Илдарха-ГIалий тIара ДжабагIанаькъан урамаш.
Iаьдало керттера терко тIайохийт, юрташка, шахьарашка туристически даькъ тIа вугаш долча урамашта. Иштта дика тоабаьб ГIажарий-Юрт-Оалкам-ТIаргим-Чми яха никъ, цу наькъ тIа гIолла вода «Iарамхи» оалача курорте, иштта «Аьрзи» яхача заповеднике. Цул совгIа, тоадаьд Эбарга-Юрта, СоагIапченна тIадолхаш дола наькъаш. Илдарха-ГIала-Яндаре яха никъ кердабаьккхар, из 8 километр ба, юхебиса 4 километр никъ тоабергба хьатIадоагIача шера.
Белгалду, мехка Минавтодора ший болх дика а, бехктокхаме а дIабахьарах, цу даькъ тIа дика толамаш даха таро хилар», - аьлар мехка кулгалхочо Келаматанаькъан Махьмуд-Iаьлас.
ХьатIадоагIача шера лаьрхIад 30 километр никъ тоабе, иштта чакхбаккха безаш ба Галашка Эсах тилла тIий тоадара болх.
