Юртбоахама кооператива кулгалхочо 850 эзар cом лочкъадарах дегабуам бу
31.07.2024 12:00
Ӏаьдала ахча диараш лохаш ба бокъонаш лораераш. Мехкарча юртбоахама кооператива кулгалхочун тӀатеттар 850 эзар сом рузкъа да. Из хоам «Сердалога» бир МВД болхлоша.
Экономикацарча кхерамзлен оагӀон болхлоша, МВД, ФСБ болхлоша дӀабихьача тохкама балхо яхачох; 2022-ча шера лаьттан хьал тоадеш дӀабихьача балха дайнар меттаоттаде ахча дийхад юртбоахама гӀулакхех йолча Министерствогара кооператива кулгалхочо.
Харцахьа оттадаьча каьхаташца тийшаболх кхостабаь, министерствера 850 эзар сом ахча ийцад цо. «Тийшаболх» яхача статьях гӀулакх хьадийллад цун духьала Ӏаьдало. Мехкара аравала йиш йоацаш, бокъо йийхка ва из карарча хана.
