БӀухошта лаьрхӀа мухь бахьийта кийчо еш ба мехка
ТӀема аренашка Даьхен гӀулакха арабаьнна латтача 503-ча мотострелкови полкá эшаргйолча хӀамай мухь бахьийта кийчо еш ба мехка. «Сердалога» из хоам бир мехкадаь зарбан болх лелабераша.
Укх наькъа бӀухошта йохьийтача хӀамашта юкъе я ши автомобиль, квадрокоптераш, квадроцикл, тӀема аренашка эша кхыбола гӀирс. Вай мехкадас Келаматанаькъан Махьмуд-Ӏаьлас кулгал деш, дӀайихьача кхетаче белгалдир, карарча хана эзараш къаман къонгаш тӀема аренашка лакхача боараме шоай декхараш кхоачашдеш латтилга.
«Каст-каста кхетаченаш хул са вай бӀухошца, царна карарча хана эшар фуд тахкар духьа. Тахан тӀема моттигашка къаьстта чӀоагӀа эшаш да саг чувоацаш гӀетташ лела гӀирсаш; цудухьа, вай бӀухошта гӀо хургдолаш, дронаш йохьийт хӀамашца», - белгалдир Мехкадас.
Командираша шоашта эш аьннар теркалдеш, вӀашагӀтехай хӀамаш. БӀухошта эшар Ӏалашдеш бола болх дӀахо а дӀахьоргба вай мехка.
