ГӀалгӀайче жӀайхой поэта Гамзатов Расула кхолламах дувц
23.09.2023 22:06
ГӀалгӀайчен библиотекашка кхетаченаш дӀахьош я, жӀайхой цӀихеза поэт Гамзатов Расул ваь 100 дузарца дувзаденна. Мужечарча юкъара ишкола дешархошта лаьрхӀа дӀадихьар кхетама сахьат. Цига моттигерча библиотекан болхлоша кердадаьккхар «Вахар сих ма ле, сабарде, къамаьл дергда вай…» яха поэта кхолламах дола дакъа.
ЖӀайхой поэт, прозаик, таржамхо, халкъа поэт Гамзатов Расул дег чура везаш ва селий мехкарча халкъанна. Цун лерхӀам боккха ба, селий мехка байза ца Ӏеш, Россе а доазол арахьа а бовзаш, дуненна литература юкъебодаш ба из.
«Оаха дийцар берашта, Гамзатов Расула керттерча кхолламах, цо цӀаккха а къалургдоацаш дитача мугӀарех: безамах, доттагӀалах, дикалах, нийсхонах, хозалах, хьаькъалах, сийх, тешамах, деналах. Иштта бераша терко тӀаяхийтар «Гамзатов Расула дега мукъам» яхача книжкай гойтама», - аьлар «Сердало» газетага юртарча библиотекан болхлоша.
