Цунах аьлар ГӀалгӀайчен паччахьалкхен кулгалхочун заместитела Фаттахов Тимура, ше гойтама конференце дакъа лоацаш. Из дӀахьош хиннар вар Россе гӀишлошъяра, вахара-коммунальни боахама министра гӀонча Ересько Алексей. «ДоагӀачул тӀехьадиса дӀахьош да балхаш, хӀана аьлча цхьайола моттигаш къоастае езаш яр. Бакъда лаьрхӀа мел хинна бурув теха даьннад. ХӀанз коа тӀара доазув тоадеш да тхо: асфальт Ӏобилла безаш ба, бай дӀабе беза, чура карташ йистеяха еза, иштта кхыдола кӀезига балхаш дисад», - аьлар Фаттахов Тимура. ТӀехьара тӀа Аьлтий-Юрта бурув теха хиларах, таро хургья 24 000 куб. м. денна-бус хий хилийта. Проектах 10 керда бурув тоха дезаш да. Укхаза иштта хургья керда хий лоаттаду моттигаш, насосий станци. Аьлтий-Юртара хий лоаттаду моттиг тоаеш латт, республикан бахархошта цахаддаш хий лоаттадайта дагахьа. Моттигерча Ӏаьдало шийна могар ду, из дош дизза кхоачашдара.