Вай мехкара 22 никъ тоабеш, болх дӀахьош латт
100 км кхоачаш йолча 22 моттигера наькъаш тоадеш боккха болх ба мехка укх шера дӀахьор. Мехкадаь зарбан болх лелабераша бир тха газетага из хоам.
Вахарера моттигаш меттайоалаярах йолча къаман проектага гӀолла тоабе дӀаболабаьраш 12 никъ ба, царна юкъера 8 никъ тоабаь баьннаб. Цу юкъе ба Эбарга-Юрта тӀабода никъ, СоагӀапченна тӀабода никъ, Шолжа-Шахьар -Горагорск-МагӀалбик (Пхьилекъонгий цӀерах бола урам) яхача наькъацара дакъа. Карарча хана болхлой Илдарха-ГӀалий тӀара тӀий тоадеш боахк, иштта тоадеш латт Илдарха-ГӀала-Яндаре, ГӀажарий-Юрт-Оалкам-ТӀаргам яха наькъаш.
Цул совгӀа, юртара моттигаш тоаярах йолча паччахьалкхен программага гӀолла 5 моттиг тоаеш болх дӀабахьа беза, царна юкъера 4 моттиг тахан кийча я: ЗАО «ЖӀайрахь» яхача моттига, иштта ООО «АлМаВит Фрут», Булгучанаькъан КФХ, «Теплицай боахам ТӀой-Юрт», ГӀанажанаькъан КФХ яхача моттигашта тӀадолха наькъаш меттадоаладаьд.
Мехкара машиний наькъаш тоадарах йолча программага гӀолла болх дӀабихьаб пхе моттиге. Дукха ха йоацаш тоадаь даьлар Юкъерча Ачалкхера тӀий. Карарча хана балхаш дӀахьош латт Долакха-Юрта-ГӀайрбика-Юрта, Шолжа-Шахьар-Горагорск-МагӀалбик яхача наькъашка, Кен яхача хин лакхера Эккажкъонгий-Юртара тӀий тоадеш боахк. Иштта тоабир Наьсаре-Терек-Долакха-Юрт яха никъ.
«Федеральни оагӀоно новкъостал лоаттадеш, мехкарча кулгалхоша хьаллоацаш, наькъаш тоадарах болча балха юкъе белгала моттиг дӀалоацаш ба вай мохк. Экономически оагӀонца, наьха вахара хьал тоадарца лоархӀаме, боккха болх ба из тахан», - белгалдир вай мехкадас Келаматанаькъан Махьмуд-Ӏаьлас, баьча балхах дувцаш.
