Мехка хьадалийтар 1-ча оагӏонцарча заӏапхочун соцадаь пенси
Заӏапхо йола Наьсарера яхархо ера, сага бокъонех вола викал волча латкъа. Цо белгалдечох, маьтсела бетта денз соцадаь латташ дар цун пенси. Вахара ганза болхлоша яхачох, 59 шерга кхаьча къоаналах дола пенси доладаларца дувзаденна дар из. Заӏапхо йола кхалсаг цу гӏулакхо чӏоагӏа дог дохадаь яр, хӏана аьлча из пенси мара кхы хьатӏадоагӏаш хӏама дац цун, хӏаьта тахан хиланза яргйоаца молхаш ийе ахча доацаш йисаяр из.
«Сага бокъонех волча викало Россе Вахара ганзага гӏолла хьатехкар из гӏулакх. Цу оагӏонцарча болхлоша белгалдечох, 2022-ча шера кхалсага пенсионни гӏулакхага хьожача хана, цо болх баьча ханаца дувзаденна цхьацца кхоачамбоацараш гучадаьнна хиннад, цунга хьежжа пенсе боарам цӏаькха юхалаьрхӏаб. Дӏахо, 2022-ча шерарча оагӏой бетта ше хиннача боарамах хьадоладалийтадар пенси СФР. 59 шу даьнна къоаналах дола пенси долалуча хана хинна хувцамаш да уж», - дийцар «Сердалога» мехкарча УПЧ.
Белгалдечох, заӏапхо йолча яхархочун бокъонаш боаггӏача боараме меттаоттаяьй. Таханарча дийнахьа цун пенси 29 991 сом да. Цу юкъедода заӏапхочунга хьажарах луш дола ахча а. Укх шерарча кӏимарса бетта 2022-ча шерарча оагӏой бетта денз соцадаь лаьтта мел хиннар а хьаделар цунна.
