ГӀалгӀай мехка къаман проекта чудоагӀаш дола наькъаш 100% тоадаь даьннад
Хьалха белгалдаь хиннача беса, 2004 шера «Кхерамзлен дика наькъаш» яхача къаман проекта чудоагӀаш, вай республике тоабе лаьрхӀад, юкъара хьаийцача, 28 км йолаш бола 15-тта машина никъ.
Цунца дувзаденна, хьахержача моттигашца контракташ оттаяьй, мах а къоастабаьб, болх дӀачӀоагӀбаьб, яхаш, хоам бир «Сердало» газетага ГӀалгӀайчен машина наькъий министерствос.
Наькъашдехкараша яхачох, «Магас – Наьсарен-Шахьара даькъ тӀа тоабергба 11 урам. МагӀалбика кхален даькъ тӀа дӀахьоргда машина наькъаш тоадара балхаш «Заьзгакъонгий-Юрт-Махьмад ХитӀе-Моздаке, цигара баьлча тоаде лерхӀаш долча наькъех да, «Боккха никъ Кавказ Наьсаре-МагӀалбик-Лохера Къаским-Тийрк». Цул совгӀа карарча шера тоаде лерхӀаш да Наьсарен кхален Эккажкъонгий-Юртарча Кен оалача хи тӀа гӀолла тилла тӀий.
«Ший ханнахьа наькъаш тоадара йола контракт оттаяр, «Кхерамзлен дика наькъаш» яха къаман проект кхоачашъяра бола толам ба. Хьалххе из чӀоагӀъяь хиларо таро хулийт, балхаш а шоай ханнахьа дӀадоладе. Къахьегача наьха де дезача балхий план оттайой, цо таро хулийт гӀишлон материалашца йоагӀаш йола Ӏалашо е», - аьлар ГӀалгӀай Республикан машина наькъий министра Хаматхананаькъан Батыра.
