Тока оагӀонцара лоархӀаме моттигаш тоаеш боахк мехка
Лоаман моттигашка гӀолла чакхйоалаш йола «Котиева – Первомайская» яха 35 Кв йола тока саьрг хувцаш ба тахан цу оагӀонцара болхлой. Галашкара, Мужечара, Оалкамара, ДаьттагӀара тока хьал меттаоттадеш хургба из болх.
Хьалхара балхаш карарча хана чакхдаьха баьннаб цига: 7,5 км дӀоахал дола керда моттиг вӀашагӀъеллай, 63 аьшка бӀоагӀа бегӀа 23 км кхоачаш тока саьргаш чудаьхкад. Эса лакхе гӀолла долхаш хинна тока саьргаш цигара кхычахьа дӀадехьадаьхад, догӀаш латтача хана хулаш бола кхерам юстарбаккхар духьа. ДӀахо кхы а 93 бӀоагӀа хувца беза, 45 км кхоачаш саьргаш хувца деза, иштта 22 км ди детташ, тӀоа сегача хана тока саьргаш лорадеш бола трос хувца беза.
Вай мехкадас Келаматанаькъан Махьмуд-Ӏаьлас белгалдир, цу моттигашкара токацара хьал тоаде, аьнна. Цхьаккха кхерам юкъе боацаш, нийсача кӀийлен тӀа даьккха хила деза деррига, вай Мехкадас теркалдечох. «Къаьстта лоархӀаме я из проект ДаьттагӀарча моттигашта, хӀана аьлча дукха архитектуран, археологически моттигаш я цига».
Белгалде деза, из лоархӀаме болх федеральни оагӀоно гӀо деш дӀахьош болга. 595 млн сом рузкъа да цу балхо дӀалаьцар. 2026-ча шерарча аьтинга бетта чакхбаккха лерхӀ беррига болх. Из тока оагӀув 1962-ча шера вӀашагӀъеллай, цунга хьежжа, дукха хана денз хувцамаш де дезача хьале эттаяр.
