«Россе кхалсага дог» яхача фестивала доакъашхошта, совгӏат делар
«Даьхен лорабой» ганза Гӏалгӏайче гӏолла йолча филиала безбир Майкопе дӏахьош хиннача «Россе кхалсага дог» яхача мехкашта юкъерча фестивале дакъа лоацаш хиннараш. Ганза филиала кулгалхочо Абаьданаькъан Ислама баркал аьлар Имагожанаькъан Мухьмада, Налганаькъан Рианайна.
«Сердало» газетага ма аллара, Аьдагӏий мехка дӏахьош хиннача кхетаче дакъа лоацаш бар СВО доакъашхой, бейнача Даьхен бӏухой дезалаш, цар гойтар гӏалгӏай къаман мах бола тӏехьале йовзийташ йола программа. Гӏалгӏайчен викалаша шоашца цига йихьар ашарий-халхарий композицеш, къаман белгалон гӏирсаш, керта тӏа техка гӏирсаш, гӏалгӏай даараш.
Абаьданаькъан Ислама баркал аьлар хьинар долча наха, цар кхоллама дакъа юкъедарах, республикашта юкъерча боарам тӏа цар хьамсара мохк гойтарах.
Ганза филиала кулгалхочо къаьстта баркал аьлар бӏухой дезалашта, цар культуран ӏадаташ лорадеш хиларах, республикан юкъарлон вахаре цар дика дакъа лацарах.
