Цар Кулгалхочунгара дийхадар республике могашал меттаоттаяра йола спортивни ишкол хьаеллар. Цунах «Сердало» газетага дийцар ГIалгIай Республикан Кулгалхочун зарбан болх лелабераша. «Сога хаьттача, из дика гIулакх да, хIана аьлча цу ишколе могашал яйнача берашта хьехаргда лакхача боарам тIа.

Бакъда цкъа хьалхагIа из хаттар тахка дезаш да, мел эшар дIа а лоархIаш», - аьлар мехкадас, иштта белгалдир хьалхарча аргIагIа де дезар. Келаматанаькъан Махьмуд-Iаьланна бакъахьа хийтар, малагIча юрташка могаш доаца бераш дукхагIа да хьажа из болх бича. Цул совгIа, дIалоархIаш хила деза, цу юкъера бераш ишколе гаьна ухаргдоацаш дола дош а.

«Сай оагIорахьа сона бакъахьа хет, бераш хIанззе а ГIалгIайчен ФОКашка аха кийчдар. Бакъда цига царна мегаш дола хьалаш хила деза. Могашал яйнача наха эшаш да спортаца дувзаденна мел дар, цу даькъе яхьаш дIаяхьар а. Цу тIа вай новкъостал де деза царна. ХIанз уж бахача моттигашка новкъостал ду вай, бакъда из массе оагIорахьара хургдола болх вIашагIболла беза. Хьожаргда вай республике хоадам болаш цу тIехьа фу вIаштIехьадоал», - аьлар Келаматанаькъан Махьмуд-Iаьлас.