Мехкарча моттигех тӀема сийлен цӀераш техкаргья
Мехкарча моттигех тӀема сийлен цӀераш тахкарах йола бокъо тӀаийцар мехка. Халкъа Гуллама хьалхашка хӀара шерарча балхах дувцаш йолча кхетаче белгалдир из дош вай Мехкадас Келаматанаькъан Махьмуд-Ӏаьлас.
Сийлахь-боккхача Даьймехка тӀем тӀа белгалбаьннарий турпалал лархӀара, мехка тӀема-исторически селхане йиццаялийтара тӀехьа дӀахьош болх ба из. ЦӀераш тергья Даьхе лораеш лаьттараша лакха майрал, денал гойтача шахьарашта, юрташта. Вай Мехкадас белгалдир, Коталон 80 шу дизача хана чӀоагӀъяь из бокъо чӀоагӀа лоархӀам болаш йолга, хӀана аьлча вай мохк тӀема ханашка моастагӀа эшавара тӀема наькъашка доккха дакъа лоацаш хиннаб.
«ТӀема котало яккхара тӀехьа геттара лоархӀаме хинна тӀемаш лаьттад вай лаьтташ тӀа. ТӀема хьалхарча деношка денз, майралца, деналца Даьхе лорае, моастагӀа вохаве ураэттаб вай къаман деналах дизза дегаш хинна къонгаш, кхалнах», - белгалдир вай Мехкадас.
Мехка кулгалхочо теркалдир, юртех, шахьарех тӀема сийлен цӀераш тахкар Даьхе лораеш, моастагӀа вохавеш, лаьттарий турпалал диццадалийтарал совгӀа, кхувш латтача къонача тӀехьенна из моттиг мел лоархӀаме я, мел лакха терко е езаш я хьалхадаккхар долга. Из лакха цӀи ялара болх Мехкадаь чӀоагӀонца оттаяьча лаьрхӀача комиссес дӀахьоргба республике.
