«Цу яхье хьалхара моттиг яьккхар Илдарха-ГӀалани Яндарени культуран цӀеноша. ШоллагӀа моттиг яьккхар СоагӀапчарча а Наьсарен кхален а культуран цӀеноша. КхоалагӀа моттиг – Арштерча Аки-Юртарча культуран цӀеноша. ГӀалгӀайчен культуран министра баркал аьлар Пхьилекъонгий-Юртарча, Чамалхарча, Оалкамарча, Галашкарча, Заьзгакъонгий-Юртарча, Кердача-Редантерча, МагӀалбик- Шахьарерча, Шолжа кхалерча культуран цӀеношта. ЛаьрххӀа дола жюре совгӀат делар Лаьжгерча культуран цӀен», - аьлар «Сердало» газетага, Россе цӀихезача артисткай Йовлой К. А. цӀерагӀча республикан халкъа кхоллама цӀен кулгалхочо, республикан культуран цӀихезача болхлочо Котанаькъан Марема. Цига гулбеннарашта доккха совгӀат хилар Гуцаранаькъан Микаила байтий книжка совгӀата массанена даларах. Цун байташта таржам даьр я поэтесса ГӀазданаькъан Аьсет. СовгӀата лаьрхӀа уж книжкаш дӀадийкъар республикан халкъа кхоллама цӀен кулгалхочо.