ТӀема операцен доакъашхошта, болх бе моттигаш Ӏалашъергья республике
ТӀема операцен доакъашхошта эшаш дола гӀо деш хургба республикан хьакимаш. ОМС доакъашхошца, иштта кхыболча оагӀон болхлошца Наьсаре дӀайихьача кхетаче из белгалдир вай мехкадас Келаматанаькъан Махьмуд-Ӏаьлас. Из хоам «Сердало» газетага бир Мехкадаь зарбан болх лелабераша.
«Яндаре вахача Китенаькъан Б. хьоахадир, тӀема операцен юкъе хинна цӀабаьхкача наха балха моттигаш Ӏалашъяра гӀулакх. Аз дӀаях шуга, Даьхен гӀулакха ший са ца кходеш, лаьттача бӀухоех цаӀ болх боацаш, эшаш дола новкъостал доацаш вусаргвац, аьнна!
Россе президента Путин Владимира белгалдир, вайна юкъе эггара чӀоагӀагӀа лархӀа безараш, Даьхе лораеш лаьттараш хургба, аьнна. Даьхен гӀулакха арабаьннараш, эггара хьалхарча мугӀаре латтаргба!» - аьлар вай Мехкадас, цу хаттара жоп луш.
Республика кулгалхочо дийцар, тӀема доакъашхой деша безам болаш хуле, уж раьза болчча моттиге деша, болх бе аьттув лургба царна, яхаш.
