Буро тӏарча тӏема училищен курсанташта, сийленг хьаделларгда Гӏалгӏай мехка
Гӏалгӏайчен Магӏалбика кхале кийчо еш ба, Буро тӏарча тӏема училищен курсанташта дагалоаттама улг хьаделлара. Из хетаду С.М.Кирова цӏерагӏча Буро тӏарча тӏема училищен курсанташта, Магӏалбик лораеш хиннача лоархӏамеча тӏема операце сийленца шоаш цар гойтарах. Сийленг оттадир Соагӏапча, из цига оттадар могадир, иштта дакъа лаьцар Даькъасте гӏолла йолча Россе МВД Керттерча урхаллено.
1942 шера тов бетта немций бӏу чугӏертар Алханчуртски атагӏе, из мехкдаьттанна тӏакхача лаьрхӏа бар. Дикагӏа йолча вермахта танкашта, СС «Викинг» бӏуна духьалъэттар бала кийча болаш Цӏеча Эскара бӏухой, царна юкъе турпала латар гойтар С.М. Кирова цӏерагӏча НКВД Буро тӏарча тӏема училищен курсанташа.
Училище вӏашагӏбеллар танкашта духьала тӏом бара долча герзаца кийчо яь бола бӏу. Магӏалбика кхален даькъ тӏа Даькъасте яккхара тӏавоагӏаш хиннача моастагӏчунна духьалъэтта, къонача курсанташа денал гойтар. Духьалдеттача герза, шеко йоацаш, тӏаболхаш бар уж, моастагӏчун бронетехника шоашта гаргаеча, тӏом бара долча герзаца еттар цунна курсанташа. Цхьан дийнахьа 25 немций танк йохайора цар.
Бӏухошта эггара халагӏа дера 1942 шера тов бетта 28 гӏа ди. Цу дийнахьа дукха цӏий ӏодахар. Иштта къиза лаьттача тӏема мугӏарашка белгалбаьннача цар цӏераш цӏаккха йовргйоацаш язъяьй исторе оагӏон тӏа.
