Гӏалгӏай мехка хьабийллар Российски академе говзанчий гойтам
Гӏалгӏайчен Паччахьалкхен гойтама галерее хьайийллар Российски академе говзанчий экспозици, цига гойта оттадаьд мехка хьалхале лелаеча говзанчий балхаш. Керттера моттиг дӏалоацаш ба СССР, Россе халкъа суртанча, дукхача шерашка академена кулгал деш хиннача Церетели Зураба болх. Кердача культуран моттига къаьстта терко тӏаяхийтар республикан кулгалхоша. Цу дийнахьа цига хьажа вера Гӏалгӏайчен Кулгалхо Келаматанаькъан Махьмуд-Ӏаьла.
«Церетеле цӏи Россел арахьа дика йовзаш я. Цун балхаш да Москва, Севилье, Лондон, Нью-Йорк хозъеш. Царна юкъе да Москве латта Пётр 1 оттадаь доккха сийленг, Поклонни оалача гув тӏа латта Коталон cийленг, Тишински майдан тӏара «Дуне мел латта доттагӏал» яха болх. Тахан цу цӏихезача воккхача говзанча болх го йиш я Шолже. Гойтама цӏи я - «Ираз лохаш» - цо ма дарра гойт Зураб Константиновича кхоллама балхаш. Цун сурташка дукха бесаш, сердал, дийнача наьха болам, кеп го йиш я. Цунна уллув да Церетели Еленай, Кочемасова Татьянай, Дронов Михаила, Тугаринов Дмитре, Оздой Руслана, Ржевская Еленай кхыча суртанчий болхаш», - аьлар республикан Кулгалхочо.
Из гойтам бувцаш, Келматанаькъан Махьмуд-Ӏаьлас къаьстта белгалдир, Гӏалгӏайчен Паччахьалкхен галерея таро йолаш я федеральни боараме йола проекташ тӏаэца. Из бахьан долаш, республикан бахархой кхы баха безаш бац культуран столицашка, цӏихезача авторий балхашка хьажа.
Республикан Кулгалхочо белгалдир кхоллама болх лелабеча кагирхошта из гойтам дӏабахьар лоархӏаме хилар, цӏихезача суртанчий балхаш гуш хилча, цар а цу кхолламцара безам совбаргба, кхыча оагӏонна уйла тӏаяхийта хьожаргба. Мехкадас тӏахьийхар беррига Гӏалгӏайчен бахархой, хьаьший цу гойтамга хьажара. Цо баркал аьлар художества Российский академена, цун кулгалхочунна Церетели Василена, иштта Церетели Еленайна, Ржевская Еленайна, Оздой Руслана - ерригача тоаба, республикан бахархошта из совгӏат дарах.
