Из хьаеллаш дакъа лоацаш хилар ГӀалгӀайчен кулгалхо Келаматанаькъан Махьмуд-Ӏаьла, эллиной-румий латарах 2008 шера олимпийски чемпион, цӀихеза Россе спорта мастер Манкенаькъан Назир, иштта, дуненна М1 Лиган 2017 шера экс-чемпион, UFC латархо Йовлой Мовсар.

«Аз дош деннадар мехкахошта, берашта лаьрхӀа эггара дикагӀа дола спорта хьалаш кхолларгда аьнна, тхоашта могар даьд царна уж хилийтара, къаьстта цу чу бассейн а хургболаш. ХӀанз укхаза тайп-тайпара спортивни кхетаченаш дӀаяхьа йиш я, къона спортсменаш шоашта Ӏомабала укхаза хьаухаргба, тайп-тайпара спорта оагӀонаш дегӀайоалаяра из царна чӀоагӀа эшаш яр. Из ГӀалгӀайченна мах бола гӀишло я, цох аз баркал оал мехка Президента, Паччахьалкхенна. Къаьстта баркал оал аз мехка гӀишлош еча министерствонна, болх баьча наха, цига цар къахьегарах», - аьлар Келаматанаькъан Махьмуд-Ӏаьлас.

Шахьара моллагӀа вола вахархо цу ФОКе ваха йиш йолаш ва, ший унахцӀено тоаяра, лерттӀа унахцӀена вахар дӀадахьара. Цига тайп-тайпара спорта оагӀонаш лелаяра эшаш мел дар долаш да. Эллиной-румий латар, бокс, дзюдо, наьк дар, зӀамига футбол, баскетбол, волейбол, жӀакех ловзар цига дӀадахьа таро я. Цул совгӀа, фитнеса лаьрхӀа зал а я.

Манкенаькъан Назира даькъалабийцар Шолжа бахархой кердача гӀишлонца, цо белгалдир, хӀара сага вахаре спорт хила езилга, из лоархӀаме долга. Цо иштта аьлар, Шолжа-Шахьара кердача спортсмений цӀераш вайна юкъе кхы а яржаргйолаш, хьалъяь хийла ер керда гӀишло. Йовлой Мовсара белгалдир, унахцӀена вахар дӀахьош хилар спортсменашта меттел, хӀара сага а эшаш да, аьнна. Шолжера ФОК хьалъяьй, «ДегӀаахар» яха къаман проект кхочашъеш. Из хьалъеш дӀадахад 346,5 млн сом, царех 343,05 млн сом ГӀалгӀайченна хьадайтад федеральни бюджетера.