Магасе хьадийллар керда хьаьший цӀа
Таьрахьий дегӀаахара Академе даькъ тӀа хьадийллар республикан столице дешархошта лаьрхӀа керда хьаьший цӀа. Из хьаделлаш дакъа лоацаш хилар ГӏалгӀайчен Паччахьалкхен председатель Сластенин Владимир Владимирович, «Сафмар Плаза» яхача хьаьший цӀеной керттера кулгалхо Ӏамарханаькъан Ӏалихан.
«Сафмар Плаза» кулгалхочо хоам бир; цига хьехархой, студентий Ӏеш хилар хьалхара «Сафмар» хьакхеллача Гуцаранаькъан Микаила чотах хургда, аьнна.
«Укхаза могашал эшаеннача наха лаьрхӀа дола хьалаш а хьакхеллад, цу юкъе я Владимир Владимировича хоастаяь ши номер а, уж таханарча дено дӀадеххача беса дика хьаяь я. Фусамаш ши саг цхьана, иштта къаьстта цхьа саг Ӏе йиш йолаш я. Хьехархой а студентий а таро я тха хьаьша цӀен хьалех пайда эца», - аьлар Ӏамарханаькъан Ӏалихана.
Хьаьша цӀагӀа тайп-тайпара хьалаш да, цхьаболча хьаьшашта дика хьалаш а да. Хьалхарча гӀата тӀа атта лелалуш боацарашта лаьрхӀа фусамаш я. ШоллагӀча гӀатагара йиълагӀча гӀатага кхаччалца ши моттиг йола фусамаш а «Люкс» фусамаш а я. ПхелагӀча гӀата тӀа да Ков-студи, из лаьрхӀа да кхыча шахьарашкара баьхкача Магасерча «Ишкола 21» оалача дешаш барашта. Хьаьша цӀагӀа уж меттел, туристаш а цу балха лостамагӀа боагӀа хьаьший а Ӏе йиш я.
Тӏатоха деза, дувцаш дола хьаьша цӀа - из ӀТ тоабан дешара дакъа да, цунна чуйоагӀа «таьрахьий дегӀаахара Академи», «Ишкола 21», «ГӏалгӀайчен Бизнес-акселератор». Еррига проект «САФМАРа» ганза ший таронца лелаеш я.
