Гӏалгӏайче белгалду 1992 шера гурахьа хинна хатар
1992 шера ена гуйре, цӏаккха а йицлургйоаца лар гӏалгӏай къаман дагахьа йита ера. Из хатар вай заман Даькъастен исторе оагӏон тӏа эггара халагӏа хилар. Цу хана дукхача наьха вахар хаьдар, шоай фусамех баьлар эзараш бола дезал. Шераш дӏадахадар аьнна, дицлуш дац из. Бакъда къаман денал, цхьоагӏо йохае могаргдолаш цхьаккха хӏама дац.
Тахан Гӏалгӏайче юха а, из бала дагалоацаш, кхетаченаш дӏахьош я. «Гӏоазота кашамашка» гулбелар къоаной, кагирхой, республикан викалаш. Укхаза дӏабехка боахк цу хана хиннача хатарах бейна гӏалгӏай. Укхаза хьабоагӏа царна маьл кхайкабе, уж дагалаца цар гаргара нах, бахархой. Юкъара дагалоаттама кхетаче дӏаяхьар - из хатар дагадохар хинна ӏац, дерригача гӏалгӏай къаман тӏабена бала дагалацар да из.
Лаьрххӏача къамаьлаца чакхдоалаш дац вӏашагӏкхетараш. Цар маӏан гӏалгӏай ӏадаташца дувзаденна да. 1992 шера цу деношка бейнарий дагалоаттам беш, тахан а мичаб ца ховш бола нах дагалоацаш дукхача юрташка, шахьарашка сагӏа даьккхар, цхьана ламазаш деш, дуӏашца бийхар цу хатарах бейнараш.
Цу дагалоаттама деноша хьалхадоаккх ерригача юкъарлон исторически дагалоаттам лорабе безилга, цу тайпара хатар кхы хургдоацаш машар чӏоагӏбе безилга. Наьха дегашка латтача лазаро чӏоагӏбу хӏама хьакхоллара низ, цунца хьамсара мохк дегӏабара цхьоагӏо, барт лорабе таро лу.
Байнарашта Дала гешт долда, Дала къахетам болба, бийрза моттиг даькъала йойла!
