Республикан Конституце 30 шу дизар дездергда вай мехка
ГIалгIай Республикан Конституце 30 шу дизар дездеш ба, вай мехкарча тайп-тайпарча балха моттигашка. Моттигера вахара-экономически хьал тоадара керте лаьтта оагIув ба из. Из хоам «Сердало» газетага бир Мехкадаь зарбан болх лелабераша.
«Тахан вай мехка керттера закон - Республикан Конституци ший 30 далар дездеш я. 1994-ча шера, саькура бетта 27-ча дийнахьа, ГIалгIайчен санна ерригача Россена а атта йоаца исторически ха латтача хана, дерригача къамо дакъа лоацаш, хьатIаийцар республикан керттера закон. Референдуме дакъа лоацаш хиннача 96% наха хьаллаьцар Конституци хьатIаэцар. Цу дийнахьа хержар Халкъа Гуллама хьалхарча кхайкарала 27 депутат», - белгалдир ший къамаьла юкъе вай Мехкадас Келаматанаькъан Махьмуд-Iаьлас.
Исторически оагIонцара лоархIамедараш юкъедоаладир Конституце. Мехка кулгалхочо дийцар, РФ Конституцеца дувзаденнараш хьаллоацаш, къаман гIулакх тоадалара, наьха бокъонаш лораяра тIехьа чIоагIагIа йола лард Конституцех хиннилга. Конституцена чудоагIараш лорадеш бахаш ба тахан ГIалгIайчен бахархой. Иразе, беркате, аьттонца баха даькъалабийцар Мехкадас республикан бахархой.
