Республика кхоллара хьакъехьа референдум яь, 32 шу дизар дездергда вай мехка
Российски Федераценна юкъе ГӀалгӀай Республика хиларца, республика хьакхолларах йола къаман референдум хинна 32 дизарца дувзаденна ди дездергда вай мехко. Из хоам «Сердало» газетага бир Мехкадаь зарбан болх лелабераша.
«ВӀалла а дицлургдоаца денош дукха хиннад вай къаман вахаре. Къаман паччахьалкхе хьакхоллара тӀехьа кӀезига къахьийгадац вай, цунга хьежжа, тахан паргӀатонга кхаьчарех ба вай мохк», - белгалду Мехкадас ший телеграмм-оагӀон тӀа.
ГӀалгӀай паччахьалкхе хьакхоллаш дукха низ Ӏобиллача, цу гӀулакха оарцагӀбаьнна лийннача мехкахоех хьоахадир Мехкадас. Мехках баьха хиннача наьха бокъонаш меттаоттаярах, РФ юкъе гӀалгӀай республика хьакхолларах дола законаш вай къаманна чӀоагӀа лоархӀаме дар! Келаматанаькъан Махьмуд-Ӏаьлас белгалдир, массахана къахьега ловш, хьинаре, моллагӀа хало тӀакхаьчача ца дохаш, диканга кхача гӀерташ, вай къам хьадар; эггара лоархӀамегӀа дар да, аьнна.
«Вахара оагӀонаш тоаеш, мехка хьал меттаоттадеш, дикка къахьийгад вай. Кхоачашде дезаш дисараш а кӀезига дац! Тахан вай дӀахьоча наькъага хьежжа хургья вай къаман кхоане», - белгалдир вай Мехкадас. Иразе, беркате, бартаца баха даькъалабийцар цо мехкахой.
