ГӀалгӀай къаман
юкъара газет

Кердадараш

Палестинерча наха гӀо даьраш, белгалбир вай республике

Вай мехкадас Келаматанаькъан Махьмуд-Ӏаьлас яьча чӀоагӀонах, моттигерча паччахьалкхен хьалхара вице-премьер волча Йовлой Мухьмада, доккха баркал оалаш, грамоташ елар Палистинерча наха гӀо деш болча мехкахошта. Из хоам «Сердало» газетага бир Мехкадаь зарбан болх лелабераша. «Палестине этта хьал вай мехкахошта чӀоагӀа Ӏоткъам беш да! ХӀара денна цигара хьал зувш, Даьлагара цу наха паргӀато ехаш, могаш дола гӀо деш, да вай. Газерча мискашта новкъостал де ловраш дукха ба.

РФ президента амарца цига дахьийта новкъостал кийчде эттача, вай республика эггара хьалхарчарца гӀо даьрех я. Йоккха юкъ ялалехь, 180 тонн хӀамаш гулъе аьттув баьлар вай къаман», - белгалдир вай Мехкадас, цу гӀулакхах дувцаш. Республикан кулгалхочо теркалдир, из дика гӀулакх дӀахьош, МЧС болхлоша, Даьла духьа гӀо деш лелараша, наха гӀо деш йолча ганзаша доккха дакъа лаьцалга.

ЧӀоаггӀа баркал ала дезарех ба къаьстта уж нах, иштта дог лазаш Палестинерча мискай гӀулакхага хьажарах! Келаматанаькъан Махьмуд-Ӏаьлас, хозача дешашца ловца баьккха, баркал аьлар цу наха, цар иштта бехктокхаме къахьегарах. Цу юкъе бар МЧС болхлой, «Тешам», «Къахетамеча наьха клуб» яха наха гӀо деш йола ганзаш, Даьла духьа гӀо деш лелараш.

Вай Мехкадас белгалдир, иштта нигат долаш, вахарах бехача наха новкъостал дар, хам баь варгвоацаш, доккха дика да, аьнна. Бусалба нах къахетаме, гӀо де кийча болаш, беркате гӀулакхаш доаржадеш хила беза, аьнна, чӀоагӀдир цо.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде