«Вай республико дикка толам баьккхаб цу мугӀаре. Хьахиннар дӀалаьрхӀача, 2023-ча шера валови региональни кхоачам 1,6%-га кхоач, ВРП физически дозала индекс 101,6%-га кхоач», - язду вай Мехкадас ший телеграмм оагӀон тӀа. Республика кулгалхочо белгалдир, РФ президента Путин Владимирца юхьдухьала къамаьл деча, мехкара ВВП лакхъялар хьоахадаьлга. Хьинаре къахьегарца баьнна аьттув ба из. Вай мехка духьала санкцеш оттаяь хиннаяле а, халача хьалера арадовла, гӀулакх тоаде аьттув баьлар вай. Юртбоахаме, промышленносте дикка къахьегаш, толам баьккхаб вай республико. «Промышленни оагӀонца хьадаьчун индекс 114,3%-га кхоачаш хиларо Къилбаседа Кавказе хьалхарчарна юкъе хила, Россе 7-ча моттиге отта аьттув баьккхаб вай», - белгалду вай Мехкадас. Цхьана дӀахьош бола болх лакхача боараме дӀабода. ХӀама хьадерашта шоашта могаш дола гӀо деш, цар оагӀув хьаллоацаш ба Мехка хьалхалаттараш. 29,7% айденнад промышленноста хьал Ӏан беттагара гуйран беттага кхаччалца йолча хана, юртбоахаме хьахинначун индекс 1,2% айеннай, хьайбашцара беркат дикка даржаш латт. 2024-ча шера керттерча оагӀон тӀехьа дикка къахьега болалургба вай мохк, хӀаьта цун наькъаш белгалде дезар РФ президент ва.