Республикера къаьнагӀчарех цаӀ йола ишкол тоаергья
12.03.2025 12:31
1961-ча шерара Эбарга-Юртара ишкол, кердача куца тӀа йоалаеш, болх дӀахьоргба. 60 совгӀа йолча хана 20 эзарга кхоачаш дешархой арахийцаб цу ишколо, хӀаьта тахан боккха болх дӀахьош тоае езача хьале кхаьчай из. Цох хоам «Сердалога» бир республикерча паччахьалкхено.
«Кагирхойи бераши» яхача къаман проектага, «ТолашагӀа мел дар - берашта» яхача региональни проектага гӀолла дӀахьош ба из беркате болх. Йоккха юкъ ялале сийрдача, кердача куца тӀа йоалаяьча ишколе дешаш хургда юртара бераш», - йоах хоамо. 2022-ча шера денз вай мехка тоаяьй 35 ишкол, 2025-гӀа шу чакхдалале, тоае езаш я кхы а 5 ишкол.
Из беррига болх вай мехкадас Келаматанаькъан Махьмуд-Ӏаьлас тӀахьожам лоаттабеш дӀахьош ба тахан.
