Турпалхой дагалаьцар, «Даькъасте лаьтта тӏом» яхача кердача сийленга юхе
Келаматанаькъан Махьмуд-Ӏаьлас дакъа лаьцар, лаьрххӏа зизаш а доахкаш, дӏахьош хиннача Россе тӏема сийлен Ди хилара хетаяьча кхетачене. Магӏалбика кхален Соагӏапча «Кавказ лораяра» яха керда сийленг хьаделлаш дар. Цига гулбелар дукха лакхарча даржашка латта нах, ӏаьдала низа викалаш, юкъарло. Иштта цига дакъа лаца вера республикан кулгалхочунца цхьана, СКФО гӏолла йолча Россе МВД Керттерча урхаллен кулгалхо, иштта республикански чурча гӏулакхий Министерствон кулгалхо Котов Владимир.
«Магӏалбика лаьтта керттера дакъа дӏалоацаш дар Даькъасте лораеш лаьттача тӏем тӏа. Укхаза тӏом беш хилар бӏухой а, бахархой а цхьана, уж духьалъэттар, моастагӏа мехкадаьттанна тӏа ца кхачийта гӏерташ. Из чӏоагӏа лоархӏаме а дар. Баркал оал аз Бачурин Сергей Викторовича, ветеранашта, массанена, Магӏалбик лораеш бейнача бӏухой дагалоаттам кхолларах. Из истори ноахалгара ноахалга доалаш дӏадаха деза, вай бицбе йиш яц Даькъастен латар лаьттача ханашка, шоай са ца кходеш, моастагӏчоа духьаллатташ, вайга сийрда кхоане кхачийтара цу лаьтта лийгарий цӏераш», - аьлар Келаматанаькъан Махьмуд-Ӏаьлас.
Магӏалбика доал деча даькъ тӏа сийленг оттадар хьаллаьцар яр СКФО гӏолла йола Россе МВД Керттера урхалле. Из исторически проект кхоачашъяр цо могадир. Из лоархӏаме а я, республикан тӏема - исторически тӏехьале лораяра.
