Балхара декхараш кхоачашдеш, вахар хаьда ӏаьдала болхлой дагалаьцар мехка
Балхара декхараш кхоачашдеча наькъ тӏа вахар хаьдача МВД болхлошта хетаяь кхетаче дӏаяхьа гулбелар, Магасерча цу оагӏонцарча мемориала юхе. Мехкарча МВД кулгалхой, тайп-тайпарча оагӏонцара болхлой, Юкъарлон оагӏонцара доакъашхой, иштта ветеранаш бар цига гулбеннараш. Республикерча чухьарча гӏулакхех йолча Министерствон хьалха латташ волча полице инарал-лейтенанта Котов Владимира къамаьл дир гулбеннарашка.
«МВД болх беш мел волча хӏара сага боккха лоархӏам болаш да тахан вай укхаза гулдалар. Бехктокхаме, лакхача майралца шоай декхараш кхоачашдеш, Даьхен хӏама лорадеш, вахар хаьда болхлой ба тахан вай дагалоацараш. Кхерамга шоаш боха ца байташ, тӏехьашка ца баьнна болхлой ба уж! Вай дегашка массахана яхаргья цар цӏераш», - аьлар Котов Владимира.
Иштта цу кхетаче къамаьл дир МВД ветеранаша, тахан къахьегачар. 1994-ча шергара 1997-ча шерга кхаччалца моттигерча МВД хьалха лаьттача, балхара цӏагӏа сецача милице инарал-майор волча Агенаькъан Мухарбика къона болхлой бехктокхаме къахьегара, вахар хаьда шоай новкъостий биццабара тӏахьийхар.
Мехкарча МВД кулгалхочун гӏонча волча полице полковника Маммаев Багомеда белгалдир, Даьхен хӏама лорадара наькъ тӏа вахар хаьда 430 болхло массахана дагалаттаргволга, цар цӏераш хӏаране вахаре боча хила езилга. Тахан вайна юкъе боацача МВД болхлой дезалашта массахана терко лоаттаеш, царца бувзам болаш хургба мехка.
Лакха денал, майрал гойташ; зулама, харцон наькъаш тедара тӏехьа къахьегаш лаьтта къонгаш кӏезига бац вай къаман.
