Газ йоагаярах хьатеха хинна 97 эзар сом юхадаьккхар
ГӀалгӀай мехка газ йоагаярах моттигерча яхархочунна хьатеха хинна 97 эзар сом юхадаьккхар, шахьара прокуратуро цу тӀа болх бар бахьан долаш. Царна гучадаьлар, йоагаяь йоацача газах, бокъонах доацаш, 97 эзар сом ца доагIаш оттадаьлга, яхаш, дийцар «Сердало» газетага бокъонаш лораераша.
«Прокуратуро тӀахьожама болх дӀабихьар, юртахо леткъачул тӀехьагӀа. Газ лоаттаеш йолча компане, йоагаяь газ мелий хьагойташ бола гIирс юхакхостабаь хиларах дегабуам беш моттиг нийсъеннай.
Иштта дале а, из хьал тохкаш хиннад 2023 шера бӀаьсти. Газа тӀахьожам лоаттабара йолча организаце экспертиза а яьккха, счётчик юхакхостаяь йоацилга чӀоагӀдаьдар. Бакъда, газ йоагаеш хиларах доагӀаш дола ахча дӀахо а, ца доагӀаш, дIадехаш хиннад, счётчика тӀа латтача таьрахьашка а ца хьожаш. Цу тайпара, бокъонах доацаш, эзараш сомаш хьатехад», - аьлар тӀахьожам лоаттабераша.
Тароний Ӏалашо лоаттаяра йолча моттига керттерча кулгалхочунна хьалхадаьккхад из хIама, цу тайпара ахчанцара харцо хьанийсъяьй, бехке йоацача кхалсага бокъонаш меттаоттаяьй.
