ЦӀи йоацача лазарашта духьалара болх чӀоагӀбеш латт
УнахцӀено» яхача проектага гӀолла, цӀи йоацача лазарашта духьалара болх дикка тоабе аьттув баьннаб вай мехка. Из белгалду вай мехкадас Келаматанаькъан Махьмуд-Ӏаьлас.
Цу оагӀонца баьккха керттера гӀа ба ала йиш я, дувцача лазарашта духьала къовсам лоаттабу амбулаторни моттиг (ЦАОП) Наьсарен-Шахьара поликлинике дӀачуяхьарах. Бахархошта паргӀато луш да из гӀулакх. Иштта гаьна ядача кхалешкарча наха атто еш да Шолжа, МагӀалбика кхалешка керда ши ЦАОП хьаеллар. 3000 совгӀа унахой ба карарча хана, цу моттигаша тӀахьожам беш. Керда даьннача хӀамаша боккха аьттув лу цӀийоацар йолча унахошта дарба де.
«Вай мехкарча «Онкологически лазарашта духьала къовсам лоаттабар» яхача проекто унахцӀенон хьал тоадарал совгӀа, халача лазарех цамогаш болча наха йоккха паргӀато еннай, дикка аттачахьа даьккхад цар хьал», - белгалдир вай Мехкадас къаман проектага гӀолла кхоачашде аьттув баьннарех дувцаш.
