26 шу хьалха даьча зулама доакъашхочун гӏулакх тохкаш да судо
26 шу хьалха ӏаьдала болхлошта духьала даьча доккхача зулама доакъашхо суде кхаьчав. Из хоам «Сердалога» бир Тохкама комитето. Цо белгалдечох, 56 шу даьнна зуламхо бехктокхаме озаргва РФ УК 317 ст. (ӏаьдала болхло верах), иштта РФ УК 3-ча даькъа 327 ст. (ший доаца паспорт леладарах). 1999-ча шера ардара бетта бус «Моздаке-Буро» - «Наьсаре-Тӏой-Юрт» яха наькъий жӏара тӏа хиннад из зулам.
Наькъашкара хьал лорадеш болча полице болхлошта герз дийттад зуламхоша. Цхьа милиционер хиннача човнех веннав; шоллагӏвар, чӏоагӏа лозаваь волаш, дарбанче ӏочувигав. Зуламхой къайлабаьннаб, цу хана денз ӏаьдало лохаш хиннаб уж. Ведда лелаш ший цӏи къайлайихьа, кхыча паспортах ваьхав лаьцар.
Мехкарча Россе Тохкама комитето, МВД болхлоша цхьана болх дӏабихьа, гучадаьккхар из саг 2015-ча шера денз кхыча зуламах ха токхаш Приморскерча набахта воаллилга.
Деррига тохкаш болх дӏабихьача тохкамхоша-криминалисташа белгалдир, цу сага пӏелгий «лараш» зуламхочун лараш йолга. Республике из саг хьалвоалаваь, деррига хьагучадаьккхар цар. Судо тохкаш латт цун гӏулакх карарча хана.
