ГӀалгӀай мехка дӀалаьцар мефедрон яха молха хьачуя гӀертар
29.04.2025 12:52
ГӀалгӀайчен бокъонаш лораераша cоцавир, вай республике 500 грамм совгӀа мефедрон хьачуяхьаш воагӀар. Лелае бокъо луш йоаца из молха корайир «Лада Калина» яхача машина чура, из соцаяьяр «Кавказ» Р-217 наькъ тӀа, яхаш, дийцар «Сердало» газетага бокъонаш лораечар.
Машина чухьежача, наркотик корайир хьалхарча гӀанда тӀара, цкъа хьалхагӀа цаӀ, цул тӀехьагӀа шиъ хьоарчаяь гурмат яр уж. Хьаэзача царех хилар 500 грамм совгӀа. Полице яхачох, мефедрон лаьрхӀа я, саг юкъе а ца отташ, вайцига йохкара.
Дегабуам беш ва 35 шу даьнна Наьсарен вахархо. Цо могадаьдар шийна вовзаш волчунна, Краснодарски крае а ваха машина оатхалаш я, бакъда цо цигара хьаенараш наркотикаш я, уж машина чу дӀалочкъаяьяр.
Цу сага духьала уголовни гӀулакх хьадийллар.
