ГӀалгӀай къаман
юкъара газет

Кердадараш

ГӀалгӀайче «Ашарий атлас» яха книжка довзийташ, моттиг хилар

Шин томах латта, «Дзурдзуки» яхача ИГО арахийца книжка довзийтар Магасе. «Ашарий атласа» хьалхара ши том хетаяь я Хьоашаланаькъан Ӏаьланна, яхаш, дийцар «Сердало» газета корреспондентага.

«Цу лоархӀамеча кхетачене дакъа лоацаш хилар Халкъа Гуллама Председатела заместитель Хьаьшанаькъан Аза, цигара вице-спикер Пхьаранаькъан Руслан, гӀалгӀай йоазанхой, царна юкъе Коазой Ӏийса, Мерашканаькъан Султан, Патанаькъан Йоакъап болаш, культуран болхлой,тайп-тайпара Ӏилманхой, иштта кхыбараш», - йоах хоамо.

Из проект вӀашагӀъеллача Дзауранаькъан Танзилас, цунна новкъостал деш хиннача Дударанаькъан Анзора, 24 саг чувоагӀаш йолча ший тоабаца, царех 11 автораш а болаш, цхьан шера ах шера боккха болх баьб. «Дзурдзуки» яхача ГӀалгӀайчен историко-географен юкъарлонна доакъашхоша, Ӏилман, культуран болхлоша тохкамаш даь книжка исторен ашарий, халхарий, инструментий, иллей дакъоех латташ да.

«Ашарий атласа» чудоагӀа хӀамаш гулдаьд Россе 35 музеера, 18 архивера. Халкъа иллеш, ашараш, кхыдола культуран балхаш кхоачашдеш хиннарий биографеш цу тоабо гулйир, цар гаргарча нахага гӀолла. Ноташ увттадеш хилар халкъа цӀихеза композитор Чередниченко Александр. Абхазе Республикан цӀихезача артиста Еуаз Зубера Ӏомайир хӀара ашара оаз, Агенаькъан Тимура 230 ашара оаз вӀашагӀъеллар.

Кхы кӀезигагӀа дакъа юкъеданзар Шаденаькъан Ахьмада, Москверча къонача поэта таржам дир исторически йоазошта. Проекто таро лургья книжка арахецарал совгӀа, цу балха кӀийлен тӀа бераш Ӏомаде а. Дзовранаькъан Танзилас яхачох, болх дӀаболабеш царна вӀалла а дага дацар кандидатски диссертаци ца хиларал совгӀа, боккха болх цу юкъе боацаш хилар, цо дикка чоалханегӀа дир хьалхашка лаьтта декхар.

Тохкама болх дӀахьош, гучадаьлар, тахан вай къаман юкъе лелаеш йоаца 18 къаман ашарий инструмент хилар. Кастлуш, араяргья цхьаькха том, из язъяь хургья Новрбенаькъан Руслана сийна.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде