Бокъонца хинна хӏамаш гойташ дола «Говзанчаш» яха кино довзийтар вай мехка
Россе ФСБ болхлой гӏулакхаш, цхьан хана къайлагӏа дӏайихьа лаьрххӏа йола операцеш, иштта кхыдараш довзийташ дола «Говзанчаш» яха дукхача сереех латта кино хьахьекхар вай мехка, дӏадахача салоӏача деношка. РЕН ТВ телеканала дехарах «Триикс Медиа» яха кинокомпани я из кино доаккхаш къахьийгар, хӏаьта дакъа лоацаш бола актёраш спецназа оагӏонца лаьрххӏа кийчо еш ӏомабенна ба.
«Кино доладалале, проект хьакхеллараша, артисташа, Регионерча ФСБ оагӏон доакъашхоша дагалаьцар наьха кхерамзле лораеш шоай декхараш кхоачашдеча наькъ тӏа вахар хаьда ӏаьдала болхлой. Вай мехкадас Келаматанаькъан Махьмуд-Ӏаьлас доккха баркал аьлар ФСБ лаьрххӏа декхараш кхоачашдеча оагӏонна, РЕН ТВ канала, режиссёр волча Черняев Александра, ерригача тоабанна. Исторе эггара хала хиннача ханашка кхерамзлен хьал лорадара тӏехьа къахьегаш, вахар хаьдараш дагабохийташ хиларца из кино дега гарга долга белгалдир республикан Кулгалхочо. Мехкадас хьоахадир, цу компане вай мехка проект йоаржаяр хьалхара доацилга», - «Сердалога» из хоам бера мехкарча Паччахьалкхера.
«Триикс Медиа» Юрченко Инессаз республикан бахархошта, мехка кулгалхошта, ӏаьдала оагӏон къахьегамхошта доккха баркал аьлар кино доаккхаш гӏо дарах, иштта цо белгалдир, вай республике карарча хана дӏахьош «Даим ха тӏа» яха Росгвардех кино доаккхаш болх болга. Хӏаьта керттера продюсер волча Щеглов Сергейс хьоахадир, кино чулоацам бокъонца хинна хӏамаш юкъелоацаш оттабаь болга.
ЦСН ФСБ оагӏонна, иштта кино доаккхаш къахьийгача ерригача тоабанна баркал кхайкадеш къамаьл дир мехкарча УФСБ хьалха латтача инарал-майор волча Шевляков Максима.
Цу кинога хьажа йиш я Wӏnk онлайн-кинотеатре, хӏаьта «Говзанчаш» сериала боккха телевизионни хьокхам РЕН ТВ эфире хургба ардара бетта 18-ча дийнахьа.
