Хӏама лораде дезача моттиге куташ ярах дийцар кхетаче
Хӏама лорадарах долча гӏулакхаца (страховани) харцо лелаяра духьалара кхетаче дӏахьош хилар, мехкарча Паччахьалкхен цу оагӏонцара кхел. Из хоам «Сердалога» бера Кабмина зарбан болх лелаберашкара.
«Вице-премьер волча Кокурхой Адама дӏахьош хиннача кхетаче дакъа лоацаш вар вай мехкара керттера федеральни инспектор Гудов Залим, МВД министра гӏонча Козярский Алексей, ГИБДД МВД оагӏон кулгалхочун декхараш кхоачашдеш вола Зурабанаькъан Султан, вай мехкарча Россе Банка ГУ Къулбихьерча Къаман банка кулгалхочун декхараш кхоачашдеш вола Зайцев Вадим, иштта хӏама лорадарах болча оагӏон болхлой», - дийцар тха газетага.
ОСАГО оагӏонца дувзденнараш тоадарах, тийшаболх лелаберашта духьала къовсам лоаттабарах дийцар кхетаче. Россе Банка белгалдечох, вай мехка машинаш лораеш бола болх хила беззача тайпара бац, ма дарра аьлча, Россе моттигашкарча юкъерча боарамал лохагӏа латт. Кхетаче дийцар каьхаташца, кулг яздарца леладеча зуламех, из соцаде дезаш хиларах.
«Машин яхар дукхагӏа болча бахархой вахаре лоархӏаме оагӏув ба тахан. Полисацара болх юкъе кхоачамбоацараш доацаш хила беза. Тха декхар да тахан цу оагӏонцара тийшаболх, харцо йохаяр, из гӏулакх бокъонга хьежжа хьаоттадар», - белгалдир вице-премьера. Хӏара оагӏонца кхоачашде дезараш къоастадир кхетаче.
