ДӀахо дӏахьош ба Илдарха-Гӏала дегӏакхувлара никъ
ГӏалгӀай мехка дегӀайоагӀаш я массе оагӀорахьара Илдарха-Гӏала. Республикан Ӏаьдало декхар оттаду, цига доккхий хувцамаш де. Къаьстта цох хилар доазон дегӏакхувлара керттера майда.
ГӏалгӀай Республикан Кулгалхочун, Паччахьалкхен зарбан болх лелабераша ма аллара, укхаза дӀахьош да 15 км дӀоахал дола хин оагӀув тоаю балхаш. Из проект кхоачашъеш я «Фусамаш» яхача моттигерча проекта, иштта «Вахара хьалаш» яхача къаман проекта чуйоагӀаш.
Лайчилла бетта денз, керда балхаш дӀадолалургда. Иштта, хиш дӀаухаш йола, догӀан бӀеха хиш дӀаахара йола моттигаш хьае лаьрхӀад 4,6 км. Уж балхаш даь даргда 2027 шера. Цу юкъе хьалдеш да дукхача квартирай цӀенош. 2027 шу чакхдалале, хьалъергья 18,6 эзар. кв. метр фусамаш. Микрорайоне хӀанз йолаш я ишкол, берий беш. Дӏахо лаьрхӀад из доазув дегӀадоаладе, моттигерча бахархошта из дезаш долча беса.
«Ерригача Илдарха-Гӏалий тӀагӀолла дӀахьош ба из кердайоаккхаш бола болх. Укхаза хьалъяь яьннай центральни стадион, тоаяьй юкъарлон моттигаш. Тоаеш латт урама-наькъа моттиг, хин турбаш хувцаш я, тоадеш латт 23 метр дӀаьха дола тӀий», - аьлар ГӏалгӀайчен кулгалхочо Келаматанаькъан Махьмуд-Ӏаьлас. Цо иштта тӀатехар, цӏенхаштта тоабеш ба «Илдарха-Гӏала-Яндаре» яха 12 км бӀаьха никъ. Цул совгӀа, кастлуш хьалъе лерхӀ керда поликлиника 550 саг цхьан сменах тӏаэцаргволаш; физкультурно-унахцӀенон комплекс, бассейн болаш; культуран дегӀаахара центр.
Из деррига деш да Илдарха-Гӏала таханарча заманга хьежжа хоза а, сийрда а, бахархошта эшаш долча хьалашца Ӏалашо яь а хургйолаш», - йоах мехка Кулгалхочо.
