«Цхьана дӀалу. ЕГЭ даьша-ноаноша дӀалу Ди» яха болам дӀабахьар вайцига
Кхаьрача дийнахьа, «Цхьана дӀалу. ЕГЭ даьша-ноаноша дӀалу Ди» яха акци дӀахьоргья ГIалгIайче. Дешархой даьй-ноаной таро хургья ЦаӀ йола паччахьалкхен экзамен дӀаялара хьалаш довза, из хӀанз эггара лоархӀамегӀа да дийша боалача наьха аттестацена юкъедоагӀаш хиларах. Болам дӀахьоргба дешара, Ӏилман тӀахьожама Федеральни гIулакха теркама юкъе болаш, цо гулбергба Наьсарен №4 йолча ишколе ший доакъашхой.
«Дийша доалача берий даьй-ноаной таро хургья шоай дезалхой когаметта хила, еррига ЕГЭ дӀаялара хьалаш довза. Карарча шера исторех йола лоаца вариант язъе езаргья ЕГЭ дӀалуш, цо довзийтаргда экзамен дӀаялара декхараш.
Даьй-ноаной хиларал совгӀа, цу дийнахьа мишта хул хьажара луш йола экзамен дӀаяла таро хургья СМИ. Кхетаче дакъа лоацаш хургья республикан Ӏилман, дешара министр Боканаькъан Аьсет», - аьлар «Сердало» газетага ГӀалгӀайчен Ӏилман, дешара министерстве.
Из болх вӀашагӀбеллараша яхачох, цо даьшта-ноаношта дикагӀа довзийтаргда берашта хьалхашка латта декхараш, цунца цхьана дешара даькъ тӀа из болх цӀена дӀахьош хиларах уж дикагӀа тешаш хургба. Царна гуш хургда шоай бераш мел бехктокхаме хила деза экзаменаш дӀаялуш, цу денна малагӀа кийчо яь уж хила деза.
