Спортивни программированех йола яхь дӀаяхьа лерхӀ вай мехка
ГӀалгӀай паччахьалкхен университете, укх деношка дӀаяхьа лерхӀ спортивни программированех йола чемпионат. Студенташта, хьехархошта, иштта программировани езаш болча мехка бахархошта совгӀат хургда цу гӀулакхах.
«Шин даькъах латташ хургья чемпионат. Хьалхара дакъа 20-ча дийнахьа онлайне гӀолла дӀахьоргда, шоллагӀдар, яхьаш чулоацаш, 23-ча дийнахьа дӀадахьа лерхӀ.
«Алгоритмични программировани» яхача оагӀонца, хала лоархӀаш дола декхараш кхоачашдеш йолча яхьашка дакъа лоацаш хургба чемпионата доакъашхой», - дийцар «Сердало» газетага университете. Цу оагӀонцара шоай начӀал, кхетам сомабаккха ловш мел бола бахархой ба, чемпионате дакъа лаца йиш йолаш. Республикера спортивни программированех йола федераци я цу гӀулакха хьалхалаттар.
Яхь дӀаяхьара керттера декхар – ӀТ индустре эггара толашагӀа лоархӀаш болча оагӀонна ма хулла дукхагӀа кагирхой тӀаозар.
