Гӏалгӏай мехка дӏахьоргья мехкашта юкъера гӏазкхий культуран фестиваль
Ардара бетта 24-ча дийнахьа, Гӏалгӏайче дӏахьоргья культуран кхетаче - мехкашта юкъера фестиваль, из хетаяьй гӏазкхий ӏадаташта, культуранна, исторена. Шолжа-Шахьаре дӏахьош долча концерте цхьан сцена тӏа хургья кхоллама тоабаш, цар таро лургья цига хьажа боагӏача наха шоай мах бола культура, низ, дега безам, цахаддаш дола хьинар довза.
«Сердало» газетага Гӏалгӏайчен Миннаца ма аллара, мехкашта юкъера фестиваль тӏахьехаш я лоалахошта юкъера бувзам чӏоагӏбара, шоай культураш йовзийтара, уж лархӏара. Цига хургья хоза, безаме программаш, наха салоӏам хургба цу дийнахьа.
Гулбеннарашта хьалхашка шоай программаш гойтаргья начӏал долча артисташа, цар йовзийтаргья культура, ӏадаташ. Цу дийнахьа ший дикагӏа йола номер гойтаргья цӏихезача Ю.А. Сахарова цӏерагӏча Тирка тӏарча гӏазкхий иллей ансамбло, «Созвездие» яхача гӏазкхий кхоллама студе, «Гӏазкхий лоӏам» яхача кхоллама тоабо, «Терция» яхача цхьанкхетаро, иштта «Бирса Тирк» яхача ансамбло. Цига хургья ший кхоллам бовзийташ «Майчанка» яха халхара ансамбль.
Из доккха совгӏат да гӏазкхий фольклор езарашта, иштта халкъа искусствох доаккхал дерашта. Из цӏай вӏашагӏделлараша бахархошта дика салаӏа моттиг хилара тешал ду, цхьаккха а вусаргвац цу концерта юстара.
