Из оттадаьр вар ГӀалгӀайчен искусствай цӀихеза болхло Базорканаькъан Микаил, хӀаьта цун сценари язъяьр яр республикан культуран цӀихеза болхло Чаненаькъан Тамара. Цу юкъе дакъа лоацаш бар Ӏаьленаькъан Ӏайна, Цхьорой Азамат, Йовлой Хьава, Горчхананаькъан Залина, Хьоашаланаькъан Лолита, къона актёр Местой Ӏаьла. Иштта цига баьхкарашта программан юкъе вайра дика вовзаш вола балкхарой иллиалархо Жаникаев Эльдар, наха дуккха хӀама дагадохийташ дола «Со цӀавенав» яха илли аьлар цо.

Бехк-гунахьа доацаш, мехкахбаьхача наьха бала бувцаш дола концерт-спектакль дицлургдоацарех хилар. ХӀара сага дегахьа дисар гуш хиннар, зале цхьаккха висанзар цунна юстара, из тамашийна спектакль яьнначул тӀехьагӀа, цхьаццабарашта фу хийтар хайра тхона.

Ашарга гӀолла хьакхайкабеш хинна бала, йовхьамаш ловзаеш хиннарий оазаш, оттадаьча суртий куц нахага мел йоккха сагото кхаьча хиннай, из цар вахара мишта Ӏаткъаш хилар дувцаш дар.

«Дагалоаттама цӀермашин» яхача спектаклага хьожаш, дика гуш дар малагӀча халонех вай къам чакхдаьннад, бакъда цунца цхьана кхетадора вай вахар мел мах болаш да. Вахара мах оттабар - из массаза вай дегашка латташ хила дезар да.

Спектакло хьалхадаьккхар, дӀадахар дицденна цахилар, из къаман бала юха ца байта воашта могар де дезаш вай хилар. Цудухьа цу тайпара искусство вайна тахан эшаш я. Безам бараш кхоана а хьажа йиш йолаш ба «Дагалоаттама цӀермашин» яхача концертага-спектаклага Наьсарен-Шахьара культуран цӀагӀа.