«Йийллача наӀарий ди» яха болам дӀабихьар вай мехка
16.11.2023 09:37
«Йийллача наӀарий ди» яха болам дӀабихьар эндокринологически диспансере. Шекара диабет оалача лазара духьале еча денна хетадаь дар из гӀулакх. Из хоам тха газетага бир унахцӀенон гӀулакхах йолча министерствос.
«Мах бала ца безаш, чакхбала йиш йолаш бар цига бахархой. ДегӀацара шекар дусташ, анализаш дӀаэцаш, нахага хьожаш, бар лораш. Бахархошта дийцар цу халача лазаро дегӀа беча Ӏоткъамах, хьалхадаьккхар, мел лоархӀаме да хан-ханнахьа лорашта тӀаваха чакхвоалаш хилар. 50 совгӀа саг чакхваьлар цу дийнахьа.
Ӏилман-практически конференци дӀайихьар лораша цига цу дийнахьа. Дийцар, диспансера хьалхашка латтача декхарех, кхоачашде дезарех.
