«Цхьана дӀалу. ЕГЭ даьша-ноаноша дӀалу Ди» яха болам чакхбаьлар вайцига
Cелхан ГӀалгӀайчен Наьсарен-Шахьара №4 йолча ишкола даькъ тӀа дӀабихьар «ДӀалу цхьана. ЕГЭ даьша-ноаноша дӀалу Ди» яха болам. Из моттиг е дагадехар я Роспотребнадзор. Цу тайпара болам дӀахьош хилара бахаьн да, даьша-ноаноша дикагӀа кхетадергдолаш, ЕГЭ экзаменаш дӀалуча хана шоай бераш мишта кийчо яь хила деза, цу юкъе нийслуш дола цатоамаш хургдоацаш, из дешархочун вахаре лоархӀаме гӀулакх кхетадеш хургболаш дай а дешархой шоаш а.
Из кхетаче дӀахьоча дакъа лоацаш хилар, сенатор БӀарахой Мухарбик, ГӀалгӀайчен дешара, Ӏилман министр Боканаькъан Аьсет, ГӀалгӀайчен Халкъа Гуллама дешара, культуран, хоамий политикан комитета кулгалхочун гӀонча Хамхой Батыр. Болама доакъашхошта дика гуш хилар ЕГЭ дӀаялара регистраци мишта ю, аудиторешка бераш Ӏо мишта ховшаду, ЕГЭ дӀалуш болча дешархой балха моттигаш миштай, экзаменаш дӀалуча моттиге тохкама балха кепа тохара а сканировать дара а болх мишта дӀахьу», - аьлар «Сердало» газетага, мехка Ӏилмани дешареи министерствон зарбан болх лелабераша.
Карарча шера берий даьшта, ноаношта бокъо еннаяр, истори уроках йола экзамен дӀалуш, шоашта фу карагӀдоал хьажа.
Цу тайпара дӀахьош болча балхо дикагӀа довзийт даьшта-ноаношта берашта хьалхашка латта экзаменаш дӀаялара дола декхараш. ТӀаккха цар а, шоай аргӀагӀа, уж дикагӀа кийчо яь хилийтара терко лоаттаю.
Эггара хьалха ЕГЭ дӀаялара болх юкъебаьлар 2017 шера саькура бетта 7-ча дийнахьа. Цу хана цу юкъе дакъа лоацаш хилар 50 моттигера 3 эзар совгӀа даьй, ноаной. Из болам, бакъахьа хеташ, тӀаийцар цун берригача доакъашхоша, цудухьа из юкъеяьккхар, хӀара шера хургйолаш.
