«Баматгире Ӏийсай кердача балха тӀа аьттув балба, закон нийсхонца лораде а ший балха тӀа толамаш даха а. Из хала а чоалхане а болх ба. Кхелахо нийсхо йолаш хила веза, хӀана аьлча цох тийша да цхьаволча сага вахар. Нийсхо йола судхо - из ва законо дӀадеххача беса къахьегаш вар, юкъара вахар дика довзаш, паччахьалкхен цӀерагӀа болх беш вар», - аьлар ГӀалгӀайчен кулгалхочо Келаматанаькъан Махьмуд-Ӏаьлас, из лоархӀаме дош ше дувцаш.

Цо белгалдир, республикан Лакхехьарча суда председатела профессиональни говзал лакха хилар, цо балха тӀа нийсхо лелаеш хилар, хьамсарча мехка ше беш бола болх, ала хӀама доацаш, цо дика дӀахьош хилар. Цу дерригне а, Махьмуд-Ӏаьлас яхачох, таро хулийтаргья бокъонаш лораеча, бахархой кортамукъале Ӏалашъеча, закон чӀоагӀдеча керттера толам баккха.

Келаматанаькъан Махьмуд-Ӏаьлас иштта, ГӀазданаькъан Ӏийсайх дувцаш, аьлар; цо кулгал деча, нийсхо лелаеш йолча российски суда сийдола Ӏадаташ совдувлаш хургда, иштта шийна хьалхашка латта декхараш кхоачашдеш а хургья.