КТО дӀахьош, йохаяьча квартирашта экспертиза йоаккхаргья
КТО дӀахьош йохаяьча Илдарха-ГӀалий тӀарча квартирашта гӀишлон экспертиза яккха, аьнна, тӀадиллад вай мехкадас Келаматанаькъан Махьмуд-Ӏаьлас мехка кабмина. Из хоам тха «Сердало» газетага бир республика кулгалхочун зарбан болх лелабераша.
«Экспертизо хьагойтаргба квартираш меттаоттаеш дӀабахьа безача балха боарам. Из гӀулакх аз айса тӀахьожам беш да тахан», - белгалдир вай Мехкадас. Йохаяьча квартирашка бахача наха психологически, лорий новкъостал эший хьожаш, цар дог тедеш, мел эшаш дола гӀо деш, хьежаб республике.
Ӏаьдала болхлоша шоай операци боаггӀача боараме вӀашагӀъелла, тӀехдика дӀаяхьар теркалдир вай мехкадас Келаматанаькъан Махьмуд-Ӏаьлас. Хоастам бе безаш хӀама да, болхлоех, бахархоех саг ца лозавеш из чакхдалар. «Вай къаман маьрша вахар лорадеш латт уж кагий нах хӀара денна», - белгалдир мехка кулгалхочо.
